مثل حال الشمع امنلك اشتاك
ويزيد الشوك الك وانطر تجيني

يذوب الشمع من يشتعل بالنار
ونيران الفراك بكلبي تجويني

وانت شلون حالك شنهو صاير بيك
هم تشتاك الي و ما لحظة ناسيني

وهم ترسم دمع بعيونك الحلوات
وهم اتحن الي وكلساع تبجيني

سألت الناس كالت عافك التهواه
صدك هذا الحجي لو جذب وعيني

انه انطيتك وعد ما خلفة مهما صار
ما عوفك يا ولفي وانت تدريني

شلون تريد اعوفك وانت لب حشاي
ودمي انت الذي يسري بشرايني

عليل بعدك انه والدوة الوصفوه
كبال عيوني اشوفك وانت تشفيني

صرت كلي جرح والجرح صار يلوج
و غير ضماد حبك ما يداويني

وصرت كلك حلم تخطرني تالي الليل
واسمعك بالحلم باسمي تناديني

انه ايامي قلم بس الحبر خلصان
وانه عمري ورق بس حركتة سنيني

تمنيتك تجي و تشوف بية شصار
مثل ورقة خريف وحالي يرثيني

انت اول عشك عشتة بخيال النوم
وانت اول زرع جبتة بساتيني

واذا حبك وهم انت احلى الاوهام
وخليني بوهم لتكلي خليني

واذا حبك خناجر صارن ويه الموت
اكلها يا خناجر فدوة كطعيني

ومنك ماردت بس كلمة هاي شبيك
بلهجة كاظم الساهر احبينــــــــي
منقول

شكرا لك على الخاطرة
جد جد مميزة